BB尿片架

為左迎接細細既來臨，波利媽巡例都要做下樣（第二個心態實在太鬆散了！），開始執拾下野。依個尿片架波利仔出世後一直都用開，而家為左細細只係FILL返D野落去，又可以用多兩年。

當時由朋友家中見到後，照板轉換返到自己屋企中用，非常方便。對比起現貨買個分隔袋方放床頭，有時要係廰同房行來行去，一個DIY尿片架，會更加實用同埋齊全。

這個透明膠架購自無印，比起ikea, 日本城個D，依個都係百零蚊左右，但較厚身同唔黏塵，上下共四隔，可放既東西分類較好，底下個碌仔so far 碌左年幾，重係好come 用。

BB東東分類：

第一層：爽身粉，油，安全扣針，消毒火酒，各類沖涼，BB cream/ lotion sample

第二層：乾棉*，棉花棒，救用品－剪刀，探熱針，凡士林，濕疹膏

第三層：尿片 ＋ 濕紙巾

第四層：雜物，換片墊，膠袋仔，備用乾棉

＊乾棉，可以用保鮮盒，放定每日用既份量，之後加水，每次用都好方便啦～

＊如果驚地下多塵，第三，四層可以用包書膠封實一邊。

當中我推介必備看門口：

－babyrub 薄荷膏：一般大人用既薄荷膏成份，可能會有樟腦，小朋友自然唔用得。有時幫BB搽心口或背，冬天時會暖笠笠好訓D。

－木瓜膏：乾燥，蚊叮虫咬，普通敏感紅腫都有效，勝在成份天然。

－Zinc Cream：初生時的尿布疹非常有效，因醫院時，姑娘唔會用凡士林，只會用Zinc －cream，藥房買20-30蚊

－保心安油 （或普通BB油）：BB成日無端端會有肚風，波利仔時乜都唔識，99攞左黎搓肚仔，兩野搞掂左 ^o^

希望幫到大家！